د سټنډرډ ملي ادارې د اساسي قانون شپاړسمه کلیزه ولمانځله.
د سټنډرډ ملي ادارې د (۱۸/مرغومی/۱۳۹۸) نېټه د هېواد د اساسي قانون شپاړسمه کلیزه د یوې غونډې په ترڅ کې ولمانځله. په دې تړاو جوړه شوې غونډه کې د دغې ادارې تخنیکي مرستیال خواجه جاوېد صدیقي، مالي او اداري مرستیال احسان جلالزي، حقوقي سلاکار محمد بشیر بهرام، د اساسي قانون پر تطبیق د څار خپلواک کمېسیون د اساسي قانون د تشریح او حقوقي مشورو ډیپارټمنټ رییس خلیل الله حبیبي، د دغې ادارې یو شمېر رییسانو او کارمندانو برخه درلوده.
په دغه غونډه کې ښاغلي صدیقي د اساسي قانون په تړاو خبرې وکړې او په وینا یې چې په اساسي قانون کې د جوړښت له مخې منل شوې او پر مختللې تګلارې پلې شوې دي او همدا راز له معنوي اړخه هم په کې اسلامي ارزښتونه په پام کې نیول شوي دي چې د اساسي قانون ارزښت یې لوړ کړی دی.
د دې ترڅنګ حقوقي سلاکار محمد بشیر بهرام و ویل چې د دولتونو د مشروعیت اساس اساسي قانون دی او د ټولو ستونزو حل یې د اساسي قانون تطبیقول وګڼل. د نوموړي په وینا په یوه ټولنه کې د خلکو د ارامتیا کچه د قانون د حاکمیت له کچې سره برابره ده او په یوه ټولنه کې باید غوره قدرت اساسي قانون وي.
ښاغلي بهرام د خپلو وړاندیزونو په تړاو و ویل چې د اساسي قانون په اړه خلکو د پوهاوي لپاره دې د اساسي قانون یو شمېر مهمې مادې د معارف وزارت له خوا په تعلیمي نصاب کې درج شي.
همدا راز ښاغلي حبیبي د اساسي قانون د شپاړسمې کلیزې د لمانځلو په تړاو له سټنډرډ ملي ادارې څخه مننه وکړه او د اساسي قانون د ارزښت او لاسته راوړنو په تړاو یې خبرې وکړې. هغه د اساسي قانون پر یو شمېر موضوعاتو بحث وکړ او ترڅنګ یې په تېرو شپاړسو کلونو کې د اساسي قانون د یو شمېر پرمختګونو په اړه خبرې وکړې.
