د انسا مشرتابه پلاوي په کابل کې مېشت د ټیکا له رییس سره وکتل
د افغانستان د سټنډرډ ملي ادارې (انسا) مشرتابه پلاوي په یوې صمیمي او دوستانه فضا کې په کابل کې د ترکیې د همکاریو آژانس (ټیکا) له رییس سره وکتل.
پدې لیدنه کې چې د چهارشنبې په ورځ او د کال په وروستۍ ورځ (د ۱۳۹۷ کال د کب ۲۹مه) د انسا د سرپرست رییس په کاري دفتر کې وشوه، له لنډې پېژندنې وروسته، د انسا سرپرست دوکتور محمد موسی عَلَمی د افغانستان – ترکیې د تاریخي او دوستانه اړیکو د یادونې او پراخو همکاریو له امله مننه وکړه. ښاغلي دوکتور عَلَمی وویل چې ترکیه کولای شي په افغانستان کې د سټنډرډ جوړونې په برخه کې لازمه مرسته او همکاري وکړي.
په کابل کې مېشت د ټیکا رییس ریجای قلېنچ په سر کې د انسا نوې رهبرۍ ته د نویو ماموریتونو پرمخ وړلو له امله مبارکي ورکړه او د انسا ادارې د کارکوونکو ظرفیت لوړونه، روزنیزو پروګرامونو ترسره کول، د تجربو شریکول او د ګډو پروژو تطبیقول په نوي ۱۳۹۸ لمریز کال کې د ټیکا د لومړیتوبونو په توګه یاد کړل. ښاغلي قلېنچ ډاډ ورکړ چې د افغانستان د سټنډرډ ملي ادارې (انسا) سره به خپلې هېڅ راز همکارۍ ونه سپموي او هڅه به وکړي چې د ترکیې د اړوندو ادارو سره د انسا د اړیکو تامینولو په برخه کې به د یو ارتباطي پُل په توګه رول ترسره کوي. افغانستان کې د ټيکا رییس دغه راز وویل چې دوی په پلازمېنه کابل کې یو ۲۰۰ کسیز روزنیز مرکز جوړ چې کولی شي له ترکیې د متخصصینو په رابللو سره دلته د انسا کارکوونکو ته په بېلابېلو برخو کې روزنیز پروګرامونه برابر کړي.
د انسا سرپرست دوکتور عَلَمی د افغانستان د سټنډرډ ملي ادارې (انسا) او د ترکیې د سټنډرډ انسټیټیوټ (TSE) او د ترکیې د اعتبار ورکونې ادارې (TURKAK) د لاسلیک شوي هوکړه لیک یادونه وکړه زیاته یې کړه چې د دغه هوکړه په تمدید او د انسا د لابراتوارونو او نورو تجهیزاتو په برخه کې له اړونده ترکي ادارو سره د اړیکو په ټينګولو کې د ټيکا همکاري اړینه ده.
پدې لیدنه کې دغه راز، د انسا د اداري او مالي چارو مرستیال احسان جلالزي د ټیکا له رییس سره د ا.ا.ج جمهور رییس نېک توقعات شریک کړل او د انسا او ټیکا ترمنځ د همکاریو د پياوړتیا لپاره یې د ګډو کاري ټیمونو د تشکیل وړاندیز وکړ. د انسا د اداري او مالي چارو مرستیال په ورته وخت کې د ولسمشر لخوا پر هوايي دهلیزونو د تمرکز مسلې ته اشاره وکړه او زیاته یې کړه چې افغانستان د انسا په اډانه کې د کورنیو تولیداتو لپاره له ترکیې او د دغه هېواد له لارې تر اروپايي هېوادونو صادراتو ته لېوالتیا لري چې پدې برخه کې د ترکیې رول مهم دی.
ناسته د ډالیو په تبادلې پایته ورسېده او دواړو لورو پر لاندنیو مواردو هوکړه وکړه:
- د سټندرډ ملي ادارې (انسا) د لومړیتوبونو د مشخص کولو لپاره د ګډې کمېټې تشکیل
- د انسا د بېلابېلو برخو د اړتیاوو مشخص کولو په اړه د پروپوزل په بڼه د یو چوکاټ چمتو کول
- د اړتیاوو او وړاندیزونو د شریکولو په هکله په کابل کې د ټيکا په دفتر کې ناستې ته زمینه برابرول
د افغانستان د سټنډرډ ملي ادارې نوې رهبري هلې ځلې کوي څو له نړیوالو مرستندویو هېوادونو او نورو بنسټونو سره د همغږۍ او اړیکو په بیا تامینولو سره په هېواد کې د سټنډرډ جوړونې چارې ګړندۍ کړي.
