د بلخ ولایت د نفتي موادو لابرتوارونه د سټنډرډ ملي ادارې (انسا) ته وسپارل شول
د ولسمشرۍ ماڼۍ د حکم او د تدارکاتو ملي ادارې د پرېکړې له مخې د سټنډرډ ملي ادارې (انسا) د مالي او اداري مرستیال ښاغلي احسان جلالزي په مشرۍ یو پلاوي چې د نفتي موادو د برخې کار کوونکي او انجنیران په کې شامل وو، بلخ ولایت ته رسمي سفر وکړ چې په لړ کې یې د حیرتانو بندر د نفتي موادو لابراتوارونه د نفتي موادو د تصدۍ له ادارې څخه د سټنډرډ ملي ادارې (انسا) ته وسپارل شول.
یاد پلاوي د دغه سفر په لړ کې د بلخ ولایت له مرستیال او سرپرست والي شجاع الدین شجاع سره لیدنه وکړه چې پر یو شمېر اړینو موضوعاتو یې خبرې اترې وکړې. د دې لیدنې په اوږدو کې ښاغلي جلالزي د ادارې موخې وړاندې وکړې او د نفتي موادو د کیفیت د کنټرول پر ارزښت یې بحث وکړ. نوموړي دغه راز د بلخ ولایت مقام ته د تدارکاتي پرېکړې له مخې دغې ادارې ته د نفتي موادو د لابراتوارونو د سپارلو خبر ورکړ او په دې برخه کې یې د همکارۍ غوښتنه وکړه. د دې لیدنې په اوږدو کې ښاغلي شجاع له یادې پلاوي سره د همکارۍ ژمنه وکړه او د حیرتانو بندر ته د سفر په موخه یې د امنیت ډاډ ورکړ.
د دې سفر په لړ کې ښاغلي جلالزي له خصوصي سکټور، په بلخ ولایت کې د سټنډرډ ملي ادارې له امریت او له یو شمېر نورو اړوندو برخو سره لیدنې وکړې چې په پای کې د ولایت مقام د یو شمېر چارواکو په ملتیا یې د حیرتانو بندر ته سفر وکړ او د نفتي موادو د لابراتوارونو تسلیمي یې وکړه.
