د سټنډرډ ملي ادارې او د مالیې وزارت تر منځ د لا همکارۍ په موخه کډه ناسته ترسره شوه.
دو شنبه
۳۱/غبرګولی/۱۴۰۰
دغه غونډه چې د سټنډرډ ملي ادارې پر تشکیل بحث، د دې ادارې د کارکوونکو د معاشونو لوړولو، او د انسا ادارې او د مالیې وزارت د ګمرکونو معینیت تر منځ د همکارۍ او همغږۍ په موخه جوړه شوه، د سټنډرډ ملي ادارې لوی رییس انجنیر ذبیح الله زیارمل د مالیې وزارت له سرپرست محمد خالد پاینده سره د دغه وزارت د عوایدو او ګمرکونو په معینیت کې لیدنه وکړه چې د عوایدو او ګمرکونو مرستیال عالم شاه ابراهیمي او یو شمېر اړونده مسوولینو په کې برخه لرله.
ښاغلي زیارمل د سټنډرډ ملي ادارې د تشکیل په اړه هر اړخیزه معلومات وړاندې کړل او په وینا یې چې انسا یوه تخنیکي او تخصصي اداره ده او مهمې او حیاتي دندې په غاړه لري. نوموړي په دغه اداره کې د ۷۰ خالي تخنیکي او مسلکي بستونو یادونه وکړه او په دې برخه کې یې د جدي پاملرنې غوښتنه وکړه. هغه و ویل د تخنیکي او فني چارو د مخ ته بېولو لپاره لږ تر لږه ۴۱ (NTA) بستونو ته اړتیا ده.
ښاغلي پاینده دغه راز له سټنډرډ ملي ادارې سره د همکارۍ ژمنه وکړه او او د شته ستونزو او خنډونو د بنسټیز حل په موخه د یوه پروپوزل او د معاشونو د سکل نوې طرحې لپاره د یوه پروپوزل په چمتو کولو یې ټینګار وکړ.
د دې ترڅنګ په ولایتي څانګو کې د دفتري امکاناتو او تجهیزاتو، د کارکوونکو د معاشونو لوړولو او په خالي بستونو کې د مسلکي او تخنیکي کارپوهانو پر ګمارنه بحث وشو. د ناستې په پای کې د سټنډرډ ملي ادارې او ګمرکونو عمومي ریاست تر منځ د همکارۍ او همغږۍ په موخه د یوه ګډ هوکړه لیک پر ترتیب بحث وشو چې له مخې به یې د دواړو لوریو مسولیتونه مشخص شي او چارې به په غوره توګه پر مخ بېول کېږي.
