د سټنډرډ ملي ادارې د کابل ښار په بازارونو کې یو شمېر هغه مارکېټونه تر څارنې لاندې نیولي، چې د سیخانو پلورل په کې کېږي
په هېواد کې د ساختماني موادو د معیاري کولو او د کورنیو تولیداتو د پیاوړتیا په موخه د سټنډرډ ملي ادارې په هېواد کې د سیخ ګول د تولید او پلور د څارنې بهیر پیل کړی دی.
د سټنډرډ ملي ادارې د څارنې ټیم چې مسلکي او روزل شوي انجینران لري، دې بهیر ته دوام ورکوي او نن یې د کابل ښار په پنځمه ناحیه کې د سیخ ګول د خرڅلاو یو شمېر مرکزونه وڅیړل.
د دې پروسې موخه دا ده چې څنګه په سیخ ګول کې معیارونه پلي شي، د کورنیو توکو کیفیت لوړ شي، د مصرف کوونکو د رضایت کچه لوړه شي او په هیواد کې د ملي کیفیت زیربنا ښه شي.
