د سټنډرډ ملي ادارې رهبرۍ د یو شمېر نورو ادارو په ملتیا د کابل ښار یو شمېر پمپ سټېشنونه له نږدې وڅارل.
سه شنبه ۱۷/مرغومی/۱۳۹۸
د سټنډرډ ملي ادارې (انسا) لوی رییس ډاکټر محمد موسی علمي، د دې ادارې تخنیکي مرستیال خواجه جاوېد صدیقي، د چاپېریال ساتنې ادارې مسلکي معین عزت الله صدیقي، د نفتي موادو ریاست اداري مرستیال، د کابل ښاروالۍ د ښاري خدمتونو معین او د انسا ادارې یو شمېر مسلکي انجنیرانو د تېلو د کیفیت د څار په موخه تېره ورځ په کابل ښار کې له یو شمېر پمپ سټېشنونو څخه له نږدې لیدنه وکړه.
د دغو ادارو چاواکو د همغږۍ له مخې د ګڼ شمېر پمپ سټېشنونو تېل چک کړل چې له مخې یې د بې کیفیته تېلو د پلور له امله دوه پمپ سټېشنونه وتړل شول.
د سټنډرډ ملي ادارې رهبرۍ د تېلو پر کیفیت ټینګار وکړ او په وینا یې چې د دوی څار به دوام مومي. د انسا ادارې تخنیکي مرستیال و ویل چې ټول سوداګر مسوول دي، څو د بې کیفیته توکو له واردولو څخه ډ ډه وکړي. نوموړي زیاته کړه دوی په دې برخه کې جدي دي او هغه پمپ سټېشنونه چې له تړل کېدو وروسته بیا هم بې کیفیته تېل پلوري، نغدي جریمه کېږي او د بیا سر غړونې په صورت کې به قانوني سزا هم ویني. هغه پر سوداګرو غږ وکړ چې په دې برخه کې ورسره همکاري وکړي.
دغه چارواکي داسې مهال له پمپ سټېشنونو څخه لیدنه کوي چې په دې وروستیو کې د کابل ښار د هوا له ککړتیا څخه ښاریان شکایت کوي چې دولت یې هم پر واړندې جدي ګامونه پورته کړي دي.
