د معیار او کیفیت ادارې د نساجي او چرم د معیارونو د تدوین فني غونډه جوړه شوه
د معیار او کیفیت ادارې د نساجي او چرم د معیارونو د تدوین فني هیئت غونډه، د یو شمېر فني معیارونو د مسودو او د ازمایښت تګلارو د ارزونې او وروستۍ کولو په موخه، د دې ادارې په فني تالار کې ترسره شوه.
په دې غونډه کې د داخلي معیارونو او ودانیزو رمزونو د تدوین او ترویج رئیس مولوي محمد حنیف، د اړوند هیئت رئیس او فني غړو ګډون درلود.
د غونډې په لړ کې، د کړکیو د نرم پوښونکو ټوکرونو ځانګړتیاوو معیار د کورنۍ کارونۍ لپاره او ورسره درې د ازمايښت تګلارې تأیید شوې. همداراز، د باراني جامو لپاره د اوبو ضد ټوکر د فعالیت د ځانګړتیاوو مسوده، د هر اړخیزو اوبو ضد بالاپوشونو معیار او د نساجي توکو د چاودنې ضد ازمايښت تګلاره وڅېړل شوه او فني بحث پرې وشو.
پردې سربېره، د هئیت غړو د لوړ کشش لرونکو تاری او پودي ټوکرونو لپاره، چې د جامو په جوړولو کې کارېږي، د ځانګړتیاوو معیار هم وڅېړه او بحث یې پرې وکړ.
د معیار او کیفیت اداره د دغو معیارونو په تدوین او تطبیق سره، د نساجي او څرمنو تولیداتو د کیفیت لوړولو، د کورني صنعت د ملاتړ او د محصولاتو د نړیوالو معیارونو سره د سمون په برخه کې اغېزناک ګامونه پورته کړي دي.
