د سټنډرډ ملي ادارې د څارنې پروسه د بخارۍ جوړونې صنعت څخه د کورنیو تولیداتو د معیاري کولو په موخه دوام لري
د سټنډرډ ملي ادارې د امید آمو په نوم د بخارۍ جوړونې له یو شرکت څخه چې د کابل ولایت د دشت برچی- چهاراهي شهدا- اتفاق ښارګوټي کې موقعیت لري، څارنه ترسره کړه.
دا پروسه د اړوندو سټنډرډونو د تطبیق، ملي صنایع د پیاوړتیا او د کورنیو تولیداتو د کیفیت معیاري کولو په موخه ترسره شوه چې په دوامداره توګه به دوام ولري.
د سټنډرډ ملي ادارې د څارنې موظف شوی هیئت چې د ارزونې او مطابقت ریاست، د کیفي تصدیق پاڼو د ویش ریاست او د ملي سټنډرډونو او ودانیزو کوډونو د جوړونې او رواجولو ریاست له کارکوونکو څخه جوړ شوی و، د یاد شرکت د تولیداتو کیفیت او د سټنډرډونو د تطبیق څرنګوالی یې تر څارنې لاندې ونیوه.
