په سټنډرډ ملي ادارې کې د ملکي خدمتونو کارکوونکو د اجراأتو ارزونې روزنیزه برنامه ترسره شوه
یاده برنامه د ا.ا.ا د اداري اصلاحاتو ادارې له لوري، د سټنډرډ ملي ادارې د کارکوونکو چارو امریت په همکارۍ جوړه شوې وه.
په دې برنامه کې د سټنډرډ ملي ادارې د اداري او مالي چارو مرستیال محترم مولوي عطاءالله فرید، ددې ادارې د کارکوونکو چارو امر محترم مفتي فضل الرحمن منصور، د اداري اصلاحاتو ادارې د حقوقي چارو او ملکي خدماتو پالیسیو مرستیال محترم عزت الله امان، د کارکوونکو د اجرااتو ارزونې متخصصین او د سټنډرډ ملي ادارې د بېلابېلو برخو لسګونو کارکوونکو ګډون درلود.
په پیل کې، د کارکوونکو چارو آمر محترم مفتي فضل الرحمن منصور د اداري اصلاحاتو ادارې د پلاوي له راتګ څخه مننه وکړه او د کارکوونکو د اجرااتو ارزونې پروسه یې د ادارې د چارو د ښه والي او د کارکوونکو د ستونزو د حل لپاره مهم ګام وباله.
ددې برنامې په لړ کې د حقوقي چارو او ملکي خدماتو پالیسیو مرستیال محترم مولوي عزت الله امان د ملکي خدماتو ادارې د کارکوونکو د اجرااتو ارزونې پروسې پر اهمیت خبرې وکړې او دا ارزونه یې د کارکوونکو د فعالیتونو د موثریت او ښه والي لپاره ګټوره وبلله.
همداراز، د کارکوونکو د اجرااتو ارزونې متخصصینو د ارزونې د قانوني چوکاټ، اړینو اسنادو او د ارزونې د پروسې په اړه یو هر اړخیز پریزنټیشن وړاندې کړ.
