د سټنډرډ ملي ادارې لوی رییس د کندهار ولایت مقام په اداري غونډه کې ګډون وکړ
دوشنبه ۲۵/لیندۍ/۱۳۹۸
د سټنډرډ ملي ادارې لوی رییس ډاکټر محمد موسی عَلَمي کندهار ولایت ته د خپل رسمي سفر په لړ کې د دغه ولایت په اداري غونډه کې ګډون وکړ. یاده غونډه چې د والي حیات الله حیات په مشرۍ جوړه شوې وه، ډاکټر محمد موسی عَلَمي، د ولایت مقام مرستیالانو، ولایتي شورا، اړونده رییسانو او لسګونه نورو مسوولینو په کې برخه درلوده.
په دغه غونډه کې ښاغلي عَلَمي د سټنډرډ ملي ادارې پر مسوولیتونو او مکلفیتونو معلومات شریک کړل او په کندهار کې د دغې ادارې د څانګې پرانیستل یې د تولیدي او صادراتي موادو د کیفیت د کنټرول په برخه کې مهم ګام وګاڼه.
د نوموړي په وینا چې یاده اداره به د تولیدي او صادراتي توکو پر کیفیت جدي څار کوي.
په غونډه کې ښاغلي حیات د سټنډرډ ملي ادارې د پرانیستل شوې څانګې نوي مسوولین ګډونوالو ته ور وپېژندل.
هغه د تولیداتو او صاداراتو د معیاري کولو په برخه کې د دغې ادارې پر ارزښت خبرې وکړې او ځایي مسوولینو ته یې د خپلې همکارۍ ډاډ ورکړ.
