د سټنډرډ ملي ادارې او د افغانستان د سوداګرۍ او پانګونې خونې تر منځ هوکړه لیک لاسلیک شو.
یکشنبه
۱۲/سلواغه/ ۱۳۹۹
د سټنډرډ ملي ادارې او د افغانستان د سوداګرۍ او پانګونې خونې تر منځ د دوه اړخیزه همکاریو هوکړه لیک لاسلیک شو. د دغه هوکړه لیک په تړاو چمتو شوو مراسمو کې د ستنډرډ ملي ادارې لوی رییس عزیز احمدزي، د سوداګرۍ او پانګونې خونې لوی رییس سید زمان هاشمي، ملي سوداګر رحیم ګردیزي، د دواړ ادارو مرستیالانو، د رسنیو استازو او لسګونه نورو اړونده مسوولینو برخه لرله.
په دغه مراسمو کې ښاغلي احمدزي و ویل چې د دغه هوکړه لیک موخه په هېواد کې سوداګرو ته د اسانتیا را منځ ته کول دي چې له مخې یې د دغو دواړو ادارو تر منځ همغږي او همکاري پراخه کېږي او په هېواد کې د سوداګرو پر ستونزو، سوداګرۍ، تولید، صادراتو او وارداتو نېغ مثبت اغېز پرې باسي.
د دې ترڅنګ ښاغلي هاشمي د ستنډرډ ملي ادارې پر ارزښت خبرې وکړې او په وینا یې چې د دې ادارې فعالیتونه او چارې په هېواد کې د خلکو په ورځني ژوند او روغتیا د پام وړ اغېز لري. هغه زیاته کړه دغه هوکړه لیک د سوداګرو لپاره د اسانتیا زمینه برابروي او له دې وروسته سوداګر کولای شي چې خپلې ستونزې له واحدې سرچینې سره شریکې او حل کړي.
د دغو مراسمو په اوږدو کې د سوداګرۍ او پانګونې د لوی ريیس ښاغلي هاشمي او د انسا ادارې د تخنیکي مرستیال مطیع الله ځلاند له خوا د دوه اړخیزه همکاریو هوکړه لیک لاسلیک شو.
