د نساجۍ او چرم د سټنډرډونو د جوړولو په اړه تخنیکي غونډه جوړه شوه
د سټنډرډ ملي ادارې د نساجۍ او چرم تخنیکي کمیټې غونډه د ملي سټنډرډونو او ودانیزو کوډونو د تدوین او ترویج رئیس مولوي محمد حنیف، د اړوندې کمیټې رئیس او غړو په ګډون د دې ادارې په تخنیکي غونډو تالار کې جوړه شوه.
په دې غونډه کې، د "اوبدل شویو ټوکرانو د کړنو مشخصاتو" (چې تار او پود، کړۍ او جالۍ پکې شامل دي) سټنډرډ لومړنۍ مسوده، چې د پردو او کورنیو تزئیناتو لپاره کارول کیږي او د ASTM سټنډرډ جوړونې سازمان څخه اخیستل شوې، په هر اړخیزه توګه وڅېړل شوه.
له تخنیکي بحثونو او د اړینو او ګټورو بدلونونو له راوستلو وروسته، دا سټنډرډ د کمیټې د غړو په اتفاق سره وروستی شو.
دا سټنډرډ د شیشهاي ټوکرانو پرته، پر ټولو نورو ټوکرانو د تطبیق وړ دی.
د سټنډرډ ملي اداره په کلک هوډ سره د کورنیو تولیداتو کیفیت لوړولو، د محصولاتو معیاري کولو او د مصرف کوونکو رضایت ترلاسه کولو لپاره خپلو هڅو ته دوام ورکوي.
