د شهیدانو او معلولینو په چارو کې د دولت وزارت له سټنډرډ ملي ادارې سره د دوه اړخیزه همکارۍ هوکړه لیک لاسلیک کړ.
پنجشنبه
۱۳۹۹/چنګاښ/۱۹
د شهیدانو او معلولینو په چارو کې د دولت وزارت د معلولیت سکټور اړوند له سټنډرډ ملي ادارې سره د دوه اړخیزه همکارۍ هوکړه لیک لاسلیک کړ.
د دغه هوکړه لیک له مخې به د ښارجوړونې له وزارت او ښاروالیو سره د تاسیساتو او ودانیو په جوړولو کې د معلولینو لپاره د لاس رسي وړ سټنډرډونه شریک کېږي. دغه راز په ښوونځیو کې د معلولیت لرونکو زده کوونکو د لاس رسي وړ سټنډرډونه به طرح او طی مراحل کېږي، تر دې چې د ملي سټنډرډونو په ډول تصویب شي. له هوکړه لیک سره سم له اړونده ادارو سره په همغږۍ د سړک او پلي تګ لارو د جوړولو په چارو کې د ړندو لارویانو لپاره د ځانګړو سټنډرډونو طرح کول شامل دي.
د دغه هوکړه لیک په اساس به د اړتیا پر بنسټ د سټنډرډونو د تدوین تخنیکي کمېټې د کاري ناستو د تنظیم کمېټه ایجادېږي.
