د سټنډرډ ملي ادارې د رهبري پلاوي غونډه ددې ادارې د عمومي رئیس الحاج ملا فیض الله تمیم تر ریاست لاندې جوړه شوه
۲۷/۱۲/۱۴۴۵ هـ ق
د رهبري پلاوي په غونډه کې د سټنډرډ ملي ادارې د تخنیکي چارو مرستیال مولوي محمد آصف قانت، د مالي او اداري چارو مرستیال مولوي عطأالله فرید، د دفتر رئیس مولوي وحید احمد بدري، رئیسانو او د اړوند برخو مسئولینو ګډون کړی و چې د غونډو په تالار کې جوړ شوې وه.
غونډه د قرآن کریم په مبارکو آیتونو باندې پيل شوه.
پدې غونډه کې د بېلابېلو برخو کارونه او اجراآت تر ارزونې لاندې ونیول شول، د بېلابېلو ریاستونو وړاندیزونه او ستونزې واورېدل شوې او مناسبې لارې چارې د چارو د ښه پرمخ وړلو لپاره ورته وړاندې شوې.
په پیل کې د غونډې د اجنډا سره سم مهم موضوعات لکه د ودانیو ملي کوډونه، د روسیې هېواد د معیاریي کولو، تصدیق او اعتبار ورکولو په نړیوال سیستم کې د غړیتوب اړوند، د سټنډرډ عالي شورا په جوړولو او دې ته ورته موضوعاتو باندې بحث او د نظرونو تبادله وشوه.
د غونډې په دوام د مترولوژي د پروژې اړوند او د نورم په نوې لایحې هم خبرې وشوې.
د غونډې په پای کې د اړتیا وړ پریکړې وشوې او همدارنګه د کارونو د ښه پرمخ وړلو لپاره د اړوندو برخو مسئولینو ته لازمې لارښوونې او سپارښتنې وشوې.
